മലയാളത്തിലെ ആദ്യ വെബ് സീരീസ് 'കേരള ക്രൈം ഫയൽസ്' ഉടൻ വരുന്നു. ലാലും അജു വർഗീസും പ്രധാന വേഷങ്ങളിലെത്തുന്ന ഈ ക്രൈം സീരിയസ് ഡിസ്നി ഹോട്ട് സ്റ്റാറിലാണ് പ്രദർശിപ്പിക്കുന്നത്. പൂർണമായും കേരള പശ്ചാത്തലത്തിൽ ഒരുങ്ങുന്ന ഈ ക്രൈം സീരീസ് ഡിസ്നി പ്ലസ് ഹോട്ട് സ്റ്റാറിലാവും പ്രദർശനത്തിന് എത്തുക. ആദ്യ സീസണിൽ നടന്മാരായ ലാലും അജു വർഗീസും കേന്ദ്ര കഥാപാത്രങ്ങളാവും ഓരോ സീസണിലും തികച്ചും വ്യത്യസ്തമായ കുറ്റാന്വേഷണ കഥകളാണ് സീരീസിൽ അവതരിപ്പിക്കുക.
രാഹുൽ റിജി നായർ (ഫസ്റ്റ് പ്രിന്റ് സ്റ്റുഡിയോസ്) പ്രൊഡക്ഷൻ ചുമതല നിർവ്വഹിക്കുന്ന ഈ വെബ് സീരീസ് സംവിധാനം ചെയ്യുന്നത് അഹമ്മദ് കബീറാണ്. ജൂൺ, മധുരം എന്നീ ചിത്രങ്ങൾ സംവിധാനം ചെയ്‌തത് അഹമ്മദ് കബീറാണ്. ഉദ്വേഗജനകമായ കുറ്റാന്വേഷണ കഥയാണ് 'കേരള ക്രൈം ഫയൽസ്'. ആദ്യസീസൺ തന്നെ പ്രേക്ഷകരുടെ താത്പര്യത്തിനനുസരിച്ചാണ് ഒരുക്കിയത്. ആഷിഖ് അയ്മറിന്റേതാണ് തിരക്കഥ. ജിതിൻ സ്റ്റാനിസ്ലസ് ഛായാഗ്രഹണം നിവർഹിക്കും. സംഗീതം: ഹെഷാം അബ്ദുൾ വഹാബ്, പ്രൊഡക്ഷൻ ഡിസൈൻ: പ്രതാപ് രവീന്ദ്രൻ, എഡിറ്റിംഗ്: മഹേഷ് ഭുവനേന്ദർ.
വെബ് സീരീസുകൾക്ക് സമയപരിമിതി ഇല്ലെന്നും ലഭിക്കുന്ന നീണ്ട സമയം സ്വാതന്ത്ര്യം നൽകുന്നുണ്ടെന്നും, കഥാപാത്രങ്ങളുടെ വ്യത്യസ്ത മാനസികതലങ്ങൾ നിശ്ചിത സമയത്തിൽ പറഞ്ഞ് അവസാനിപ്പിക്കാതെ കൂടുതൽ വിശദമായി പറയാൻ വെബ് സീരീസ് സഹായിക്കുമെന്ന് സംവിധായകൻ അഹമ്മദ് കബീർ പറഞ്ഞു.മലയാളത്തിലെ ആദ്യത്തെ ഒറിജിനൽ വെബ് സീരീസ് പ്രൊഡക്ഷൻ മൂല്യത്തിലും ഗുണമേന്മയിലും വിട്ടുവീഴ്‌ച ഇല്ലാതെ പൂർണതയോടെയാണ് ഒരുക്കിയതെന്നും കഥ പറയുന്നത് കേരളത്തിന്റെ പശ്ചാത്തലത്തിലാണെങ്കിലും കേരള ക്രൈം ഫയൽസിന്റെ മേക്കിംഗും സ്റ്റോറി ടെല്ലിംഗും ഇന്ത്യയിലെ പ്രശസ്തമായ വെബ് സീരീസുകളോട് മത്സരികുന്ന വിധത്തിലാണെന്ന് രാഹുൽ റിജി നായർ പറയുന്നു. ഏതായാലും മറ്റുഭാഷകളിലുള്ള വെബ് സീരിസുകൾ കളം നിറയുമ്പോൾ മലയാളത്തിന്റെ സ്വന്തമായി പുതുമയാർന്ന നിലയിൽ വരുന്ന സീരിസ് കാത്തിരിക്കുകയാണ് പ്രേക്ഷകർ. ഇത് ഹിറ്റാകുന്നതോടെ കൂടുതൽ വെബ് സീരിസുകൾ മലയാളത്തിലൊരുങ്ങാനും സാദ്ധ്യതയുണ്ടെന്നും വിലയിരുത്തപ്പെടുന്നു.
