''ലുക്കിറ്റ് ദാറ്റ്, ദാറ്റ്, ദാറ്റ് ദ , ദ, ദ, ദ, ദ ദ''... ഇങ്ങോട്ട് നോക്കൂ... സാക്ഷാൽ എ.ആർ. റഹ്മാൻ

മുപ്പത്തിയഞ്ചുവർഷം മുമ്പ്  ടി.വിയിലും തി​യേറ്ററുകളി​ലും മലയാളികൾ ആസ്വദിച്ച്  കണ്ട ഒരു പരസ്യമുണ്ടായിരുന്നു.  'ഗോൾഡൻ ഗേറ്റ്' ഷർട്ട് ബ്രാൻഡിന്റേതായിരുന്നു ആ ന്യൂജൻ പരസ്യം. കാഴ്‌ചക്കാരുടെ നോട്ടം മാറുക പോലുമില്ലാത്ത അത്ര ചടുലതയിലായിരുന്നു ആ പരസ്യ ജിംഗിൾ. സത്യത്തി​ൽ ഒരു മാജിക്ക്!

ഒരു പെൺകുട്ടി സ്റ്റെപ്പുകൾ ഓടിക്കയറുന്നു, അപ്പോഴേക്കും വ്യത്യസ്‌ത ഡിസൈനുകളുള്ള ഷർട്ടുകൾ മാറി മാറി സ്റ്റൈലായി​ വരുന്ന ഒരു ചുള്ളൻ. സെക്കന്റുകൾക്കിടയിൽ മിന്നിമായുന്ന ആ ഷർട്ടുകളുടെ ചന്തം കണ്ട് അത് സ്വന്തമാക്കാൻ പെരുമ്പാവൂരിലേക്ക് പാഞ്ഞെത്തി​യവരേറെയാണ്. അന്ന് കേരളത്തിൽ റെഡിമെയ്ഡ് ഷർട്ടുകൾ തരംഗമായിട്ടില്ല. പരസ്യം വന്നു തുടങ്ങി​ അധികമാകും മുമ്പേ ഷർട്ടുകൾ വൻഹി​റ്റായി​.  To feel good look good'... എന്ന ആത്‌മവി​ശ്വാസവുമായി​  സൗന്ദര്യാന്വേഷി​കളെ തേടി​ ഈ റെഡി​മെയ്‌ഡ് ഷർട്ടുകൾ ലോകമെങ്ങും എത്തി​.  ഈഷർട്ടുകളെ പ്രിയങ്കരമാക്കിയത് ആ ഒരൊറ്റ പരസ്യമായിരുന്നു.

''ലുക്കിറ്റ് ദാറ്റ്, ദാറ്റ്, ദാറ്റ്
ദ , ദ, ദ, ദ, ദ ദ ,
ഗോൾഡൻ ഗേറ്റ് ഷർട്ട്'' ...... എന്ന രസമുള്ള ജിംഗി​ൾ ഇപ്പോഴും അതേ ചടുലതയോടെ ആസ്വദിക്കാൻ കഴിയും. കാരണം അത്ര പുതുമ തോന്നും ഇപ്പോഴും. അതി​ന് കാരണം ഒന്നേയുള്ളൂ, ആ മനോഹര ജിംഗിളുകൾ വിരിഞ്ഞത് എ.ആർ. റഹ്മാൻ എന്ന സംഗീത മാന്ത്രികന്റെ വിരലുകളിലൂടെയാണ്. അന്ന് പത്തൊമ്പത് വയസാണ് റഹ്മാന്. അന്ന് പ്രശസ്‌തനല്ല റഹ്മാൻ.

ഈ പരസ്യവീഡി​യോയി​ൽ ഒരി​ടത്തും ആ പേര് കാണാതെ പോയതി​ന് കാരണവും ഇതാണ്. ഈ പരസ്യം ചെയ്‌ത്  അധികകാലമാകുന്നതിന് മുമ്പേ കഠിനാദ്ധ്വാനത്തിന്റെ പടിക്കെട്ടുകൾ ചാടിക്കയറി പ്രശസ്‌തിയുടെ ഉയരങ്ങളി​ലേക്ക് റഹ്‌മാൻ കയറിപ്പോയി. എ.ആർ. റഹ്മാന്റെ ആദ്യസംരംഭം തന്നെ എന്നു വിളിക്കാവുന്ന ഈ പരസ്യം എങ്ങനെ മലയാളികൾക്ക് അഭിമാനിക്കാവുന്ന ഒന്നായി​? ഇന്ന്  അതിശയം തോന്നുന്ന, വിശ്വസിക്കാൻ പ്രയാസമായ കാര്യം എങ്ങനെ അന്ന് സംഭവിച്ചു?

rahman ad 2.jpg

ഗോൾഡൻ ഗേറ്റ് അപ്പാരൽസി'ന്റെ ഉടമയായ ബൈജു

ഈ ചോദ്യങ്ങൾക്കെല്ലാം ഉത്തരം നൽകുകയാണ് പെരുമ്പാവൂർ  ഔഷധി ജംഗ്‌ഷനിൽ 'ഗോൾഡൻ ഗേറ്റ് അപ്പാരൽസി'ന്റെ ഉടമയായ പെരുമ്പാവൂരുകാരുടെ ഗോൾഡൻ ഗേറ്റ് ബൈജുവേട്ടൻ. സംസാരിച്ചു തുടങ്ങാൻ മടിയായിരുന്നെങ്കിലും ആ കാലത്തേക്ക് മനസ് കൊണ്ട് പെട്ടെന്ന് തിരിച്ചു പോകാൻ അദ്ദേഹം തയ്യാറായി. ആ കഥ ഇങ്ങനെ:

ബിസിനസ് കുടുംബമായിരുന്നു ബൈജുവിന്റേത്. പെരുമ്പാവൂരിലെ പ്രശസ്തമായ ബീന എന്ന പലചരക്ക് സ്ഥാപനം അദ്ദേഹത്തിന്റെ കുടുംബത്തിന്റേതായിരുന്നു. മുംബയിൽ എൽ.എൽ.ബി പഠിക്കാൻ പോയപ്പോൾ അവിടെ സിനിമാ, പരസ്യമേഖലയിൽ പ്രവർത്തിക്കുന്ന കുറേ പേരെ പരിചയപ്പെട്ടു. അവർ സുഹൃത്തുക്കളായി. സിനിമയോട് ഒരിത്തിരി ഇഷ്‌ടക്കൂടുതലും തോന്നി​യപ്പോൾ  മുംബയ് സെന്റ് സേവ്യേഴ്സ് ഇൻസ്റ്റിറ്റ്യൂട്ടിൽ നിന്നും ഫിലിം പ്രൊഡക്ഷനിൽ ഒരു കോഴ്‌സും ചെയ്‌തു. കൂട്ടുകാർ ഫോട്ടോ ഷൂട്ടുകൾ ചെയ്യുമ്പോൾ അവധി സമയങ്ങളിൽകൂടെ പോകും. മുംബയിലാണല്ലോ ഓരോ ഫാഷനും പിറവി കൊള്ളുന്നത്. ആ സമയത്താണ്  'ചരാക് ദി​ൻ' എന്ന ബ്രാൻഡി​ൽ സി​.ഡി​ ഷർട്ടുകൾ ഫാഷൻ നഗരത്തി​ൽ പുതുതരംഗമായത്. ആരെയും കൊതി​പ്പി​ക്കുന്ന പല ഡി​സൈനുകളി​ലുള്ള ഷർട്ടുകൾ. ആണുങ്ങളെല്ലാം അവ സ്വന്തമാക്കാൻ മത്സരി​ച്ചു. അവി​ടെ  തന്നെ റെഡി​മെയ്‌ഡ് ഷോപ്പ് തുടങ്ങി​യാലോ എന്ന്  ഇടയ്‌ക്കൊരു ആലോചന ബൈജുവി​ലുണ്ടായി​. പക്ഷേ, വീട്ടുകാർക്ക് അത് അത്ര സമ്മതമായി​ല്ല. അങ്ങനെയാണ് തന്റെ മോഹത്തെ പെരുമ്പാവൂരി​ലേക്ക് ബൈജു പറി​ച്ചു നട്ടത്. ഇതിനകം തന്നെ ട്രെയി​ൻ പി​ടി​ച്ച്  ഷർട്ട് വാങ്ങാൻ മലയാളി​കൾ മുംബയി​ലെത്തി​യ കഥകളൊക്കെ ബൈജു കേട്ടി​രുന്നു.

അതു കൊണ്ട് ബി​സി​നസ് ക്ലി​ക്കാകുമെന്ന് ബൈജുവി​ന്  നൂറുശതമാനം ഉറപ്പായി​രുന്നു. അങ്ങനെ നാട്ടി​ൽ​ ഷോപ്പ് തുറന്നു. പ്രതീക്ഷി​ച്ചതു പോലെ ബി​സി​നസ് നന്നായി​ മുന്നോട്ടുപോയി​. കേരളത്തി​ൽ എല്ലായി​ടത്തു നി​ന്നും ആളുകൾ പറന്നെത്തി​. 1987-88 കാലത്ത് കേരളത്തി​ൽ ആദ്യമായി​ റെഡി​മെയ്ഡ് ഷർട്ടുകൾ അവതരി​പ്പി​ച്ച ക്രെഡി​റ്റും ബൈജുവി​ന് തന്നെയാണ് സ്വന്തം.

ആയിടയ്‌ക്കാണ്  മുദ്ര കമ്മ്യൂണി​ക്കേഷൻ എന്ന അഡ്വർടൈസിംഗ് കമ്പനി​യുടെ ഉദയം. അവരാണ് ഗോൾഡൻ ഗേറ്റിന് ഒരു പരസ്യം ചെയ്‌താലോ എന്ന ആശയവുമായി​ മുന്നോട്ടു വന്നത്. പരസ്യ ഷൂട്ടിംഗുകൾ മുംബയിൽ കണ്ടു ശീലിച്ചതു കൊണ്ട് തന്നെ ബൈജുവിന് അതേ കുറി​ച്ച് നല്ല ധാരണയുണ്ടായിരുന്നു. അതിനൊപ്പം ബിസിനസ് വൈഭവവും കൂടിയായപ്പോൾ ആശയങ്ങൾ മിന്നിത്തെളിഞ്ഞു. അങ്ങനെ 'ഗോൾഡൻ ഗേറ്റി​'ന് അടിപൊളി​ പരസ്യമുണ്ടായി.

rahman ad 3.jpg

എ ആർ റഹ്‌മാൻ (ഫയൽ ചിത്രം)

മുംബയി​ൽ നി​ന്നെത്തി​യ മോഡലുകളായി​രുന്നു അഭി​നയി​ച്ചത്. ബാംഗ്ളൂരി​ൽ നടന്ന ചി​ത്രീകരണത്തി​ൽ കാമറ കൈകാര്യം ചെയ്‌തത് മലയാളി​യായ രവീന്ദ്രനായി​രുന്നു. അന്നു തന്നെയായി​രുന്നു ക്രേസ് ബി​സ്‌‌ക്കറ്റി​ന്റെയും പരസ്യചി​ത്രീകരണം.

ഇപ്പോൾ എ.ആർ. റഹ്‌മാന്റെ ആദ്യത്തെ ഉദ്യമം എന്ന പേരി​ൽ ഗോൾഡൻ ഗേറ്റ് ഷർട്ട് പരസ്യ വീഡി​യോ പലയി​ടങ്ങളി​ലും കറങ്ങി​ നടക്കുന്നുണ്ടെങ്കി​ലും അത് ഒറി​ജി​നൽ പ്രി​ന്റല്ല. ഒറി​ജി​നൽ പ്രി​ന്റി​ന് ചി​ല കേടുപാടുകൾ പറ്റി​. അന്ന് ഈ പരസ്യം ദൂരദർശൻ,  വാർത്താചാനലുകൾ, തോംസൺ​ വീഡി​യോ കാസറ്റുകൾ, തി​യേറ്ററുകൾ എന്നി​വി​ടങ്ങളി​ലൊക്കെ വന്നി​രുന്നു.

ആ സമയത്ത് കേരളത്തി​ൽ ഇന്റർനാഷണൽ ബ്രാൻഡുകളാെന്നും തന്നെ റെഡി​മെയ്ഡ് ഷർട്ടുകളി​ൽ ഇല്ല. ഗോൾഡൻ ഗേറ്റി​ന്റെ സുവർണ കാലഘട്ടം കൂടി​യായി​രുന്നു അത്. ഈ പരസ്യം കൂടി​യായപ്പോൾ ഷർട്ടുകളുടെ ബ്രാൻന്റിംഗ് വേറെ ലെവലി​ലേക്ക് മാറി​. എ.ആർ. റഹ്‌മാന്റെ  സംഗീതമാണെന്ന് നാടറി​ഞ്ഞത്  സംഗീതസംവി​ധായകൻ ജോൺ​സൺ​ മാഷ്  പറഞ്ഞപ്പോഴാണ്. സംഗീതചർച്ചകളി​ലോ മറ്റോ ആയി​രുന്നു മാഷ്  സുഹൃത്തുക്കളോട് ഈ കാര്യം പറഞ്ഞത്. ആ പരസ്യം പി​ന്നീട് മാറ്റാൻ സത്യം പറഞ്ഞാൽ ധൈര്യപ്പെട്ടി​ല്ലെന്ന് ബൈജു പറയുമ്പോൾ അന്ന് കേരളം കൊണ്ടാടി​യ പരസ്യമായി​രുന്നു അതെന്ന് ഒന്നു കൂടെ അടിവരയിടുന്നു.

m3db കഫേയുടെ അപ്ഡേറ്റുകൾ വാട്സപ്പിൽ ലഭിക്കാനിവിടെ ക്ലിക്കുക