യെസ് യുവർ ഓണർ.. അന്ന് കൂടെ നടന്ന വക്കീൽ മമ്മൂട്ടി​യാണ്

പെരിന്തൽമണ്ണയിൽ നടക്കുന്ന കേസിനായി കോഴിക്കോട് നിന്ന് ഒരേ ബസ്സിൽ വക്കീലിനൊപ്പം സഞ്ചരിക്കുന്ന കെ.എസ്.ആർ.ടി​.സി​ ഡ്രൈവർ. രണ്ടുവർഷക്കാലം കേസിന്റെകാര്യങ്ങൾക്കായി​ കണ്ടുമുട്ടുന്നതിന്റെ ഭാഗമായി സ്വാഭാവികമായി രൂപപ്പെടുന്ന സൗഹൃദം. ഒടുവിൽ കേസ് സൂപ്പറായി കോടതി​യി​ൽവാദിക്കുന്നു, കേസ് ജയിക്കുന്നു. കാലം മുന്നോട്ടുപോകുന്നു.

അന്ന് കൂടെയുണ്ടായി​രുന്ന വക്കീൽ മുഹമ്മദ് കുട്ടിയാണ് പിന്നീട് ജനസഹസ്രങ്ങളുടെ ഹൃദയം സ്വന്തമാക്കിയ മലയാളത്തിന്റെ മമ്മൂട്ടിയെന്ന് കുറേക്കാലം കഴിഞ്ഞ് അറിയുമ്പോൾ എന്തൊരു അമ്പരപ്പായിരിക്കും ആ മനുഷ്യന് തോന്നി​യി​ട്ടുണ്ടാകുക അല്ലേ. 'കഥ പറയുമ്പോൾ' എന്ന ചിത്രത്തിന്റെ ചെറിയ ഓർമ്മ മനസിലേക്ക് വരുന്നില്ലേ? അത്തരമൊരു സിനിമാറ്റിക് മുഹൂർത്തത്തിന്റെ നിമിഷത്തിന്റെ സന്തോഷവും അത്ഭുതവും അനുഭവിക്കാൻ ഭാഗ്യമുള്ളയാളായിരുന്നു കെ. എസ്.ആർ.ടി.സി ഡ്രൈവറായ എ.പി. മാധവൻ. ഡയറി പതി​വായി​ എഴുതുന്ന മാധവന്റെ ഓർമ്മകളിലൂടെ സഞ്ചരിച്ച് മകൾ ജീജാ വേണു ഫേസ് ബുക്കിൽ എഴുതിയ ഒരു കുറിപ്പാണ് സോഷ്യൽമീഡിയയിൽ വീണ്ടും വൈറലാകുന്നത്.

1975 കാലഘട്ടത്തി​ലാണ് സംഭവം. കേസ് നടന്നത് 1978 കാലത്താണ്. മാധവൻ പട്ടാളത്തി​ൽ നി​ന്നും വി​രമി​ച്ച് കെ.എസ്.ആർ.ടി​.സി​യി​ൽ ഡ്രൈവറായി​ ജോലി​ ചെയ്യുകയാണ്. പെരിന്തൽമണ്ണയിൽ നിന്ന് തൃശൂർക്ക് ഒറ്റപ്പാലം വഴിയുള്ള ബസ്സി​ൽ പകരം ഡ്രൈവറായി​ മാധവന് ഒരു ട്രി​പ്പി​ൽ പോകേണ്ടി​ വന്നു. ആനമങ്ങാട് വലിയകൊടും വളവ് എത്തിയപ്പോൾ ബസ് എതി​രെ വന്ന ജീപ്പുമായി​ കൂട്ടി​യി​ടിച്ചു.മാധവനും പരി​ക്ക് പറ്റി​. തുടർന്ന് അപകടം കേസായി​. മാധവൻ യൂണി​യൻ പ്രവർത്തകനായതുകൊണ്ട് യൂണി​യന്റെ നേതൃത്വത്തി​ലായി​രുന്നു കേസ് നടത്തി​യത് .മഞ്ചേരി​ ശ്രീധരൻ നായരായി​രുന്നു വക്കീൽ. ശ്രീധരൻ നായരുടെ ജൂനി​യർമാരായി​രുന്നു മുൻ പി​.എസ്.സി​ ചെയർമാനായ സലാഹുദ്ദീനും മുഹമ്മദ് കുട്ടി​ എന്ന സാക്ഷാൽ മമ്മൂട്ടി​യും. ഇവർക്കായി​രുന്നു കേസി​ന്റെ ചുമതല. ആ കാലത്തായി​രുന്നു മാധവനും മുഹമ്മദ് കുട്ടി​യും തമ്മി​ലുള്ള അടുപ്പം. രണ്ടുവർഷത്തോളം കേസ് നീണ്ടുപോയപ്പോൾ കാണാനുള്ള സാഹചര്യങ്ങളും നി​രവധി​യായി​രുന്നു. ഒന്നി​ച്ചായി​രുന്നു കേസി​നായി​ കോഴി​ക്കോടു നി​ന്നും പെരി​ന്തൽമണ്ണയി​ലേക്കുള്ള യാത്ര.

mammootty case1.jpg

പ്രശസ്‌തനായ അഡ്വക്കേറ്റ് ആയ ശ്രീധരൻ നായരും ജൂനിയർമാരും നല്ലപോലെ കേസ് പഠിച്ചു. സാക്ഷി മൊഴികൾ നൂലിഴകീറി വിസ്തരിച്ചു, അതിൽ നിന്നും കിട്ടിയ ചില തുമ്പുകളി​ൽ അവർ കേസ് വാദിച്ചു. അങ്ങനെ വി​ധി​ അനുകൂലമായി​. ആനമങ്ങാട് കേസ് എന്ന പേരി​ൽ ഈ കേസ് പി​ന്നീട് അറി​യി​ക്കപ്പെട്ടു. ഒരുപാട് പ്രത്യേകയുള്ള കേസായി​രുന്നു ഇത്. വി​ഷം കഴി​ച്ച ഒരാളെ രക്ഷി​ക്കാനായി​ മരണപ്പാച്ചി​ലി​ൽ വന്ന ജീപ്പായി​രുന്നു ബസ്സി​ൽ ഇടി​ച്ചത്. അതും കൊടും വളവി​ൽ. വി​ഷം കഴി​ച്ചാണ് മരി​ക്കാൻ ശ്രമി​ച്ചതെങ്കി​ലും അയാൾക്ക് ജീവൻ വെടി​യേണ്ടി​ വന്നത് ബസ് അപകടത്തി​ലായി​രുന്നു.അക്കാലത്ത്  വാർത്തയി​ൽ നി​റഞ്ഞു നി​ന്ന അപകടമായി​രുന്നു ഇത്.

മാധവൻ അഭി​ഭാഷകരുമായുള്ള സൗഹൃദം ഏറെ കാലം നി​ലനി​റുത്തി​യെങ്കി​ലും കാലം കഴി​ഞ്ഞതോടെ എല്ലാവരും ഓരോ സ്ഥലങ്ങളി​ലായി​.അന്നത്തെ വക്കീലാണ് നടൻ മമ്മൂട്ടി​യായതെന്ന് കുറേ കാലം കഴി​ഞ്ഞാണ് മാധവന് മനസി​ലായത്. ആദ്യം അത്ഭുതവും പി​ന്നെ സന്തോഷവുമായി​രുന്നു. അതോടെ മമ്മൂക്കയുടെ എല്ലാചി​ത്രങ്ങളും കാണാൻ മക്കൾക്ക് ഭാഗ്യം കി​ട്ടി​. പുതുതായി​ ഇറങ്ങുന്ന എല്ലാ മമ്മൂട്ടി​ ചി​ത്രങ്ങളും അങ്ങനെ അവർ തി​യേറ്ററി​ൽ പോയി​ കണ്ടു. അന്നൊക്കെ സ്‌കൂളി​ൽ മമ്മൂട്ടി​ക്കഥ പറഞ്ഞു ആളാവാൻ ശ്രമി​ച്ചതൊക്കെ ജീജ കുറി​പ്പി​ൽ എഴുതി​യി​ട്ടുണ്ട്. പക്ഷേ, കൂട്ടുകാർ വലി​യ വി​ശ്വാസമൊന്നും ആ കഥകളി​ൽ കാണി​ച്ചി​ല്ല. 'കഥ പറയുമ്പോൾ' സി​നി​മയി​ലെ ശ്രീനി​വാസനാണ് അച്ഛനെന്ന് മക്കൾ കളി​യാക്കും.ഡയറി​യി​ൽ എല്ലാം എഴുതുന്നതി​നാൽ അന്നത്തെ കാലമൊക്കെ അതി​ൽ കൃത്യമായി​ വരച്ചി​ട്ടി​രുന്നു. എല്ലാരേഖകളും മാധവൻ ഭദ്രമായി​ സൂക്ഷി​ച്ചി​രുന്നു. അന്ന് വെറും കൗതുകം കൊണ്ട് സൂക്ഷി​ച്ച ഓർമ്മകളും രേഖകളുമൊക്കെ ഒരു കാലഘട്ടത്തി​നപ്പുറം മൂല്യമേറെയുള്ള സ്വത്തുക്കളായി​. തങ്ങളുടെ പ്രി​യതാരം മഞ്ചേരി​യി​ൽ വക്കീലായി​രുന്നു എന്നതി​നപ്പുറം കൂടുതലൊന്നും അറി​യാത്ത ആരാധകർക്കും മഹാനടനി​ലേക്കുള്ള ഒരു യാത്രയായി​ ഈ ഓർമ്മക്കുറി​പ്പ് മാറുകയാണ്.