"സുജാത എന്തു രസമാണ് ! എന്നോട് ആളുകൾ പറഞ്ഞു കൊണ്ടിരിക്കുന്നു"
ഒരു പൂവ് വിരിയുന്നതു പോലെ ഭംഗിയുണ്ട് സെബാസ്റ്റ്യന്റെയും സുജാതയുടെയും അടുപ്പത്തിന്. ഇഴയടുപ്പത്തിന്റെ കെട്ടുറപ്പ് കൊണ്ടു കൂടിയാണ് ആ ബന്ധം 'പുരുഷപ്രേതം' സിനിമയുടെ കാഴ്‌ചക്കാരും അതേ പോലെ ഉൾക്കൊണ്ടത്. സുജാതയെന്ന കഥാപാത്രത്തെ അതിമനോഹരമായി അവതരിപ്പിച്ച ദേവകി രാജേന്ദ്രൻ നൃത്തം, തിയേറ്റർ മേഖലകളിൽ സ്വന്തം ഇടം കണ്ടെത്തിക്കഴിഞ്ഞ, ഓരോ നിമിഷവും സ്വയം പുതുക്കുന്ന, മറ്റുള്ളവരെ കേൾക്കാനും സംസാരിക്കാനും ഇഷ്ടമുള്ള ചിന്തിക്കുന്ന ആർട്ടിസ്റ്റാണ്. നൃത്തത്തിലൂടെയാണ് കലാരംഗത്തേക്ക് ദേവകി ചുവടു വച്ചതെങ്കിലും കലയുടെ വിവിധ മേഖലകൾ പകരുന്ന ആനന്ദമാണ് ദേവകിയെ മുന്നോട്ട് നടത്തുന്നത്. ദേവകിയ്‌ക്കൊപ്പം കുറച്ചു നേരം.
ദേവകിയുടെ മനസിലെ സുജാത തന്നെയായിരുന്നോ സംവിധായകൻ കൃഷാന്തിന്റെ മനസിലുമുണ്ടായിരുന്നത്?
ഇങ്ങനെ ചെയ്യണം, അങ്ങനെ ചെയ്യണം എന്നൊന്നും കൃഷാന്ത് പറഞ്ഞിരുന്നില്ല. കാരക്ർ ബ്രീഫിംഗ് നടത്തുകയേ ഉള്ളൂ. ഇങ്ങനെയാണ് വേണ്ടത്, ഇതാണ് ഇമോഷൻ, ഇനി കാരക്‌ടറിനെ ഇങ്ങോട്ടേക്കാണ് കൊണ്ടു പോകുന്നത് എന്ന് പറഞ്ഞു തരും. നമ്മൾ ചെയ്ത് നന്നായിട്ടുണ്ടെങ്കിൽ അത് കൊള്ളാം വച്ചേക്ക് എന്നു പറയും. ആർട്ടിസ്റ്റുകൾക്ക് കൃഷാന്ത് കൃത്യമായ ഒരു സ്‌പേസ് തരും. നമ്മൾ ചെയ്‌ത സീൻ നമുക്ക് വർക്കായില്ലെങ്കിൽ കൃഷാന്തിനും വർക്ക് ആവില്ല. റേഷൻ കടയിലെ ഒരു സീനുണ്ട്. അതിൽ പഞ്ചിംഗ് മെഷീനിൽ വിരൽ വയ്‌ക്കുന്ന ഭാഗം ചെയ്‌തപ്പോൾ എനിക്ക് ഓക്കെയായില്ല. ഇത്തിരി കൂടുതലായോ എന്ന് തോന്നിയതു കൊണ്ട് രണ്ടാമതും ഷൂട്ട് ചെയ്തു. അവിടെയും നമ്മുടെ അഭിപ്രായം പരിഗണിക്കും.
നേരത്തെ തന്നെ അവതരിപ്പിക്കാൻ പോകുന്ന കഥാപാത്രത്തിന്റെ ഡെപ്‌ത് പിടി കിട്ടിയിരുന്നോ?
സിനിമയുടെ സ്ട്രക്‌ചർ, എന്റെ കാരക്ടറിന്റെ വളർച്ച എന്നിവ കൃഷാന്ത് നേരത്തെ തന്നെ പറഞ്ഞിരുന്നു. സിനിമയുടെ പ്ളോട്ട്, ഞാൻ മനസിലാക്കേണ്ട ഭാഗങ്ങൾ എന്നിവയെ കുറിച്ച് അങ്ങനെ ഐഡിയ കിട്ടി. കഥാപാത്രങ്ങളുടെ ലെയേഴ്‌സ് ആണ് ഞങ്ങളെല്ലാവരും കൂടുതലും ചർച്ച ചെയ്‌തത്. ആ ചർച്ച എനിക്ക് നന്നായി വർക്കായി. സിനിമയുടെ മൊത്തം കഥയുടെ ഡീറ്റെയ്‌ൽസ് ഞാൻ അറിയേണ്ട ആവശ്യമുണ്ടായിരുന്നില്ല. ആർട്ടിസ്റ്റുകളെ കൺഫ്യൂഷൻ ചെയ്യാതിരിക്കാനുള്ള നല്ലൊരു രീതിയാണതെന്ന് എനിക്ക് തോന്നുന്നു.
ദർശന രാജേന്ദ്രൻ, ദേവകി രാജേന്ദ്രൻ. സിനിമയിലെ നായികമാരുടെ സാമ്യമുള്ള പേരുകളിൽ കൺഫ്യൂഷൻ ഉണ്ടായോ?
പേരുമായി ബന്ധപ്പെട്ട് സിനിമാസെറ്റിലൊന്നും കൺഫ്യൂഷൻ ഉണ്ടായില്ല. കാരണം ഞങ്ങൾ ഒന്നിച്ച് വരുന്ന സീനുകൾ ഇല്ല. പിന്നെ പലരും നിങ്ങൾ സിസ്റ്റേഴ്‌സ് ആണോ എന്ന് ചോദിക്കാറുണ്ട്. അല്ലേയല്ല, മുടിയിലൊക്കെ ചെറുതായി സാമ്യമുണ്ട്. സാദൃശ്യമുള്ളതു കൊണ്ട് ഞങ്ങൾക്ക് ഒന്നിച്ച് വർക്ക് ചെയ്യാൻ പറ്റുമായിരിക്കും.
ദേവകിയുടെ പേരിൽ കൗതുകമുണ്ടല്ലോ?
എന്റെ അച്ഛമ്മ ജനിച്ച അതേ മലയാളമാസത്തിൽ അതേ നക്ഷത്രത്തിലാണ് ഞാനും ജനിച്ചത്. അങ്ങനെ എനിക്ക് അച്‌ഛമ്മയുടെ പേര് കിട്ടി. ഇപ്പോൾ ദേവികമാർ കുറേ പേരുണ്ട്. ഈ പേര് അധികം കേട്ടിട്ടില്ല. അത്ര പെട്ടെന്ന് എന്റെ പേര് മറന്നു പോകില്ല എന്ന് തോന്നുന്നു.
സുജാതയുടെ ശബ്‌ദം ദേവകിയുടേതല്ലേ?
അതേ. ഞാൻ തന്നെയാണ്. എന്റെ ആദ്യത്തെ പടമായ 'കെമിസ്ട്രി' യിൽ മാത്രമാണ് മറ്റൊരാൾ വോയ്‌സ് നൽകിയത്. അത് എനിക്ക് ഒട്ടും യോജിക്കാത്ത ശബ്‌ദവുമായിരുന്നു. നമ്മുടെ ശബ്‌ദവും കൂടി ചേരുമ്പോഴാണ് ഒരു പൂർണത തോന്നുന്നത്. മറ്റു ആറോളം ചിത്രങ്ങളിൽ ഞാൻ ഡബ് ചെയ്തു
നൃത്തം വഴി, നാടകത്തിലൂടെ, സിനിമയിലേക്ക്. അങ്ങനെയല്ലേ?
തിരുവനന്തപുരം റിഗാറ്റയിലാണ് നൃത്തപഠനം തുടങ്ങിയത്. എന്റെ ഗുരു ഗിരിജ ടീച്ചറുടെ സഹോദരനാണ് വിനു കിരിയത്ത്. വിനു ചേട്ടൻ എഴുതി വിജി തമ്പി സംവിധാനം ചെയ്‌ത 'കെമിസ്ട്രി' എന്ന സിനിമയിൽ ആ പരിചയം വച്ചാണ് അവസരം ലഭിച്ചത്. പതിനൊന്നാം ക്ളാസിലായിരുന്നു അന്ന് ഞാൻ. പിന്നെ ഒരു നാടകം ചെയ്തു. നൃത്തം പഠിച്ച ഒരാൾ വേണമായിരുന്നു ആ വേഷത്തിന്. തിരുവനന്തപുരം വിമൻസ് കോളേജിലെ സംസ്‌കൃതം അദ്ധ്യാപികയായ അന്നപൂർണ ടീച്ചറാണ് എന്നെ സജസ്റ്റ് ചെയ്ത്. അങ്ങനെ നാടകത്തിൽ കേറി. പിന്നെ ഒരു ഷോർട്ട് ഫിലിം ചെയ്തു. ഞങ്ങൾ സുഹൃത്തുക്കൾ ചേർന്ന് 'സ്ളീപ്‌ലെസ്ലി യുവേഴ്സ്' എന്നൊരു സിനിമ ചെയ്ത് ഐ. എഫ്. എഫ്. കെയിൽ സ്ക്രീൻ ചെയ്തു. അങ്ങനെ പതുക്കെ പതുക്കെ അഭിനയത്തിലേക്ക് തിരിച്ചു വന്നു. ഇടയ്‌ക്ക് നൃത്താവതരണവുമുണ്ട്.
അഭിനയമാണ് സ്വന്തം മേഖലയെന്ന് അപ്പോൾ ഉള്ളിൽ തോന്നിയിരുന്നോ?
അങ്ങനെ ഒരു തോന്നൽ ശക്തമാകുന്നത് സത്യത്തിൽ ഇപ്പോഴാണ്. ഇതെനിക്ക് പറ്റുന്ന കാര്യമാണെന്ന ഉറച്ച ഒരു ബോദ്ധ്യം വരുന്നതും ഇവിടെയാണ്. എന്താണെന്ന് എനിക്കറിയില്ലെങ്കിലും ഞാൻ ചെയ്യുന്നതിലെന്തോ നല്ലത് ഉള്ളതു കൊണ്ടാണല്ലോ ആൾക്കാർ വീണ്ടും വീണ്ടും വിളിക്കുന്നത്. എനിക്ക് ഓർഗാനിക്കായി പറ്റുന്നത് പെർഫോമൻസ് ആണെന്ന് ഇപ്പോൾ അറിയാം. അതുകൊണ്ട് എന്റെ സ്‌കില്ലുകൾ പരമാവധി പുറത്തേക്ക് കൊണ്ടു വരാൻ ശ്രമിക്കുന്നു. വർക്ക് ഷോപ്പുകളിൽ, ചർച്ചകളിൽ എല്ലാം ഞാൻ പങ്കെടുക്കാറുണ്ട്. ആളുകളുമായി സംസാരിക്കാൻ, അവരെ കേട്ടിരിക്കാൻ ഞാൻ ഇഷ്‌ടപ്പെടുന്നു. ഓരോ ആളുകളുടെയും വീക്ഷണകോണുകളിൽ നിന്നുള്ള കാഴ്‌ചകൾ അഭിനേതാവിനെ സംബന്ധിച്ചിടത്തോളം സ്വയം വളരാനുള്ള സ്‌പേസുകളാണ്.
ദേവകി സ്വയം തിരിച്ചറിയുന്നത് ഇങ്ങനെയാണല്ലേ?
അതേ. ഓരോ പെർഫോമൻസുകളും എനിക്ക് അത്ര പ്രിയപ്പെട്ടതാണ്. എന്റെ അൾട്ടിമേറ്റ് ഇഷ്‌ടം അവിടെയാണ്. അത് സ്റ്റേജാണെങ്കിലും സ്ക്രീൻ ആണെങ്കിലും തിയേറ്ററാണെങ്കിലും ജീവനാണ്. ഇത് ഓരോന്നും ആത്മാവ് പകർത്തിയാണ് ചെയ്യാൻ പരിശ്രമിക്കുന്നതും.
കുറേ ആളുകളിലൂടെ വളരാനുള്ള അവസരങ്ങൾ ദേവകിക്ക് കിട്ടിയിട്ടുണ്ട്?
നാടകത്തിൽ വന്നത് എന്റെ ടീച്ചർ പറഞ്ഞതു കൊണ്ടാണ്. അവർക്കത് പറയാൻ തോന്നിയതു കൊണ്ടാണ് ഞാൻ ഇവിടെ നിൽക്കുന്നത്. നിശബ്ദമായി പ്രോത്സാഹിപ്പിക്കുന്ന കുറേ പേർ ചുറ്റിലുമുള്ളത് ഹാപ്പി ഫീലിംഗാണ്. എനിക്ക് തോന്നുന്നത് ക്യൂരിയസ് ആയ ആളുകൾക്ക് മാത്രമേ വളർച്ചയുള്ളൂ എന്നാണ്. നമ്മുടെ ക്യൂരിയോസിറ്റി കാരണം ഉത്തരം തേടി തേടി പോകും. ഇത് എന്താ, ഇത് എന്തു കൊണ്ടാണ് അങ്ങനെ. ഞാൻ ഡാൻസ് പഠിക്കുന്ന സമയത്ത് എനിക്ക് തോന്നിയത് ശാസ്ത്രീയ നൃത്തം മാത്രം പോരാ, ഇതിൽ വേറെ ഏതോ ഒരു ലെയർ കൂടി അറിയാനുണ്ടല്ലോ എന്നാണ്. അങ്ങനെയാണ് നാടകത്തിലോട്ട് പോകുന്നത്. നാടകം ചെയ്യുമ്പോൾ അത് ഡാൻസിന് ഒന്നുകൂടെ സഹായിച്ചു. പിന്നെ നാടകത്തിലെ ആളുകളുമായി സംസാരിക്കുമ്പോൾ മനസിലായി ഇതിനെക്കാളുപരിയായി ഡെപ്‌ത്ത് ഉണ്ടെന്ന്. ഒരു ആർട്ടും പൂർണമല്ലല്ലോ. കവിത എൻജോയ് ചെയ്യാനും ഒരു പ്രോസോ, പെയിന്റിംഗോ ആർക്കിടെക്‌ചർ കണ്ടാലോ, ഒരു നല്ല പൂവ് കണ്ടാലോ അത് പ്രശംസിക്കാനുള്ള കഴിവും മനസും ആർട്ടിസ്റ്റിന് വേണമെന്ന് എനിക്ക് തോന്നുന്നു. എന്നാലേ നമ്മൾ വളരുകയും മുന്നോട്ടു പോകുകയും ചെയ്യൂ. എപ്പോഴും ഒരു ക്യൂരിയോസിറ്റി ഉള്ളിൽ സൂക്ഷിക്കാൻ കഴിയണം. എന്തു പഠിച്ചാലും ചെയ്യുമ്പോഴും സമാന്തരമായി മറ്റു കാര്യങ്ങൾ കൂടി കണ്ടും അറിഞ്ഞും ഇരുന്ന് മനസിലാക്കിയാലേ നമ്മൾ മെയിനായി വയ്‌ക്കുന്ന കാര്യത്തിന് ഒന്നു കൂടെ ആഴം വരികയുള്ളൂ. ഇങ്ങനെ കുറേയധികം ചോദ്യങ്ങളാണ് എന്റെ ഉളളിലുണ്ടായിരുന്നത്. എല്ലാ ഉത്തരങ്ങളും പൂർണമായിട്ടില്ല. യേശുദാസ് സാർ പറയുന്നതു പോലെ ഇതൊരു സാഗരമല്ലേ. ഞാൻ ചോദ്യങ്ങൾ ചോദിക്കുമ്പോൾ അത് പരിമിതമാണെന്ന് അവരും പറയുന്നില്ല. ഇനിയും ചോദിക്കൂ എന്നാണ് പറയുന്നത്. എന്റ ഡാൻസ് ടീച്ചർ മൈഥിലി തിയേറ്റർ ചെയ്യാൻ പോകുകയാണെന്ന് പറഞ്ഞാലും ചെയ്യൂ എന്നേ പറയൂ. സത്യസന്ധമായി, ഇഷ്‌ടം കൊണ്ടാണ് ഇതെല്ലാം ചെയ്യുന്നതെന്ന് വീട്ടുകാർക്കുമറിയാം. അതുകൊണ്ടും അവരും കൂടെ നിൽക്കും.
സുജാതയെ പ്രേക്ഷകർക്ക് കൃത്യമായി മനസിലായല്ലോ?
അതേ. ബ്യൂട്ടിഫുളായാണ് സെബാസ്റ്റ്യനുമായുള്ള ബന്ധം കാണിച്ചിരിക്കുന്നത്. അത് മേക്കേഴ്സിന്റെ ചിന്തയാണ്, തീരുമാനമാണ്. ആ ബന്ധത്തിൽ ട്വിസ്റ്റ് വന്നതിനുശേഷവും അവർ പരസ്‌പരം ഓകെയാണ്. കഥാപാത്രങ്ങളെ അവതരിപ്പിച്ച രീതി കൊണ്ടാണ് ആളുകൾക്ക് സുജാതയെ ഇഷ്‌ടപ്പെട്ടത്. സുജാതയെ ഒരിക്കലും ഡാർക്ക് ലൈറ്റിന്റെയോ, നെഗറ്റീവ് ഷെഡിന്റെയോ പശ്ചാത്തലത്തിൽ അല്ല കാണിക്കുന്നത്. നല്ല വെളിച്ചത്തിലാണ് സുജാതയെ നമ്മൾ കാണുന്നത്. ഭർത്താവ് കാണാതാവുന്ന സ്ത്രീയാണ്. അവർ ഒരു ബന്ധത്തിലുൾപ്പെടുമ്പോൾ ചോദ്യങ്ങൾ ഉയർന്നേക്കാം. പക്ഷേ, സിനിമ അവരെ ജഡ്‌ജ് ചെയ്യുന്നേ ഇല്ല. അവരുടെ യാത്രയിൽ നമ്മളും ഭാഗമാകുന്നതു പോലെയാണ് കൃഷാന്തും അജിത്തുമൊക്കെ ശ്രദ്ധയോടെ ആ റോളിനെയും ആ ബന്ധത്തെയും സിനിമയിൽ കൊണ്ടു വന്നത്.
തുറന്ന മനസോടെ സ്വീകരിക്കുമെന്ന് പ്രതീക്ഷിച്ചിരുന്നോ?
ഷൂട്ടിന്റെ സമയത്ത് ഒന്നുകിൽ നന്നായി സ്വീകരിക്കപ്പെടും അല്ലെങ്കിൽ ഉണ്ടാവില്ല എന്നൊരു തോന്നലുണ്ടായിരുന്നു. പക്ഷേ, പ്രിവ്യൂ ഷോയിൽ തന്നെ ഒരുപാട് പേർ നല്ല അഭിപ്രായം പറഞ്ഞു. എനിക്കാണെങ്കിലും പൊതുവേ പോസിറ്റീവായ പ്രതികരണങ്ങളാണ് ലഭിക്കുന്നത്. അത്രയധികം വിമർശിച്ചു കണ്ടില്ല. അതാണ് മേക്കേഴ്സ് അങ്ങനെ ചിന്തിച്ചതു കൊണ്ടാണെന്ന് ഞാൻ പറഞ്ഞത്. സെബാസ്റ്റ്യനും സുജാതയും തമ്മിലുള്ള ബന്ധത്തിന്റെ സത്യസന്ധത ആളുകൾക്ക് മനസിലായി. അവരുടെ കെമിസ്ട്രി ഇഷ്‌ടപ്പെട്ടെന്നാണ് കൂടുതൽ പേരും പറഞ്ഞത്. പൂവ് വച്ചിട്ടുള്ള രണ്ടുപേരും നോക്കുന്ന രംഗമൊക്കെ ആളുകൾ എടുത്തു പറഞ്ഞു.
മൂന്നു പ്രധാന ഇടങ്ങളുണ്ട് ദേവകിക്ക് ഇപ്പോൾ. ഇനി എവിടെ കാണാം?
ഇപ്പോ ഇല്ല. പെർഫോം ചെയ്യന്നതാണ് ഇപ്പോൾ ഏറ്റവും വില മതിക്കുന്നത്. മറ്റൊരാളുടെ കൂടെ വർക്ക് ചെയ്യുമ്പോഴാണ് എന്റെ ബെസ്റ്റ് പെർഫോമൻസുകൾ വന്നിട്ടുള്ളത്. ഡാൻസ് കുറേ കൂടി എന്റെ ആത്മാവിഷ്‌കാരങ്ങൾ കൂടിയാണ്. കൊറിയോഗ്രാഫി എനിക്ക് വലിയ ഇഷ്ടമാണ്. ചിലപ്പോൾ സിനിമയിൽ എപ്പോഴെങ്കിലും അവസരം ലഭിക്കുകയാണെങ്കിൽ ചെയ്യും. അതേ പോലെ പാട്ട് സീക്വിൻസിൽ വരുന്ന ചെറിയ മൂവ്‌മെന്റുകൾ ഒക്കെ ആവിഷ്‌ക്കരിക്കാൻ ഇഷ്ടമാണ്. സംവിധാനമോ, എഴുത്തോ ഒന്നും ഇപ്പോൾ ആഗ്രഹിക്കുന്നില്ല. നാളെ ഉൾവിളി വരികയാണെങ്കിൽ തീർച്ചയായും ചെയ്യാം.
നൃത്തം പരിശീലിപ്പിക്കുന്നുണ്ട്. അല്ലേ?
ഡാൻസ് പഠിപ്പിക്കാൻ വളരെ ഇഷ്ടമാണ്. കുട്ടികളോട് സംസാരിച്ച് അവരുടെ മനസറിഞ്ഞാണ് പറഞ്ഞു കൊടുക്കാൻ ശ്രമിക്കാറുള്ളത്. ചോദ്യങ്ങൾ ചോദിക്കുന്നത് എനിക്കിഷ്‌ടമാണ്. ഉത്തരങ്ങൾ പറയുന്നതിലൂടെ, അല്ലെങ്കിൽ കണ്ടെത്തുന്നതിലൂടെ ഞാനും വളരുമെന്നാണ് എന്റെ ചിന്ത.
പുതിയ വേഷങ്ങളിൽ ഇനി എപ്പോഴാണ് കാണുക?
ഹോട്ട് സ്റ്റാറിൽ ഒരു വെബ് സീരീസ് വരാനുണ്ട്. പിന്നെ ധ്യാൻ ശ്രീനിവാസൻ, വിജയ് ബാബു എന്നിവർക്കൊപ്പമുള്ള രണ്ടു സിനിമകൾ കൂടി ഉണ്ട്. അത് നേരത്തെ ചെയ്‌തതാണ്.
